Psalms 40

Kumqondisi wokuhlabela. ElikaDavida. Ihubo.

1Ngamlindela ngesineke uJehova; waphendukela ngakimi wezwa ukukhala kwami.

2Wangenyula emgodini ototayo, wangikhupha edakeni lexhaphozini; wamisa izinyawo zami edwaleni, wangipha indawo eqinileyo yokuma.

3Wangipha ingoma entsha emlonyeni wami, ihubo lokudumisa kuNkulunkulu wethu. Abanengi bazabona besabe babeke ithemba labo kuJehova.

4Ubusisiwe umuntu owenza uJehova abe lithemba lakhe, ongathembi abazigqajayo, lalabo abaqambukela kubonkulunkulu bamanga.

5Zinengi, Jehova, Nkulunkulu wami, izimangaliso ozenzileyo. Izinto owasilungiselela zona kakho ongazibala kuwe; aluba bengingakhuluma loba ngilandise ngazo, zingaba zinengi ngokweqileyo ukuzibalisa.

6Kawufisanga imihlatshelo leminikelo kodwa izindlebe zami uzikleklile; iminikelo yokutshiswa leminikelo yesono kawuzange uyidinge.

7Lapho-ke ngasengisithi, “Ngilapha, sengifikile – kulotshiwe ngami emqulwini.

8Ngiyakunxwanela ukwenza intando yakho, O Nkulunkulu wami; umthetho wakho usenhliziyweni yami.”

9Ngiyafakaza ngokulunga ngisemhlanganweni omkhulu; angizivali izindebe zami, njengoba usazi, O Jehova.

10Ukulunga kwakho kangikufihli enhliziyweni yami; ngikhuluma ngokuthembeka kwakho lokusindisa kwakho. Kangilufihli uthando lwakho leqiniso lakho emhlanganweni omkhulu.

11Ungasigodli isihawu sakho kimi, O Jehova; sengathi uthando lwakho leqiniso lakho kungahlala kungivikele.

12Phela izinhlupheko ezingelakubalwa zingihanqile; izono zami sezingificile, kangisaboni. Zinengi kulezinwele zekhanda lami, njalo inhliziyo yami isiphela amandla.

13Ncibilika, hawu Jehova, ungisindise; hawu Jehova, woza masinyane uzongisiza.

14Sengathi bonke abafuna ukuqeda impilo yami bangayangiswa basanganiswe; sengathi bonke abafisa ukungidiliza bangabuyiselwa emuva beyangekile.

15Sengathi bonke abathi kimi, “Hiya belo!” banganengwa lihlazo labo.

16Kodwa-ke sengathi bonke abakudingayo bangathokoza bajabule kuwe; sengathi labo abathanda insindiso yakho bangahlala besithi, “UJehova kadunyiswe!”

17Kodwa mina ngiyahlupheka, ngiyaswela; sengathi uJehova angangikhumbula. Ulusizo lwami lomkhululi wami; O Nkulunkulu wami, ungalibali.
Copyright information for NdeIBE